د لاسرسۍ وړ لېنکونه

تازه خبر
شنبه ۲۵ غویی ۱۴۰۰ کابل ۱۱:۳۵

خبرونه

امریکا کې افغان مبصرینو د طالبانو سیاسي مشرانو سره د سولې اړوند خبرې وکړې

هاشم وحدتیار ازادي رادیو ته :دا د ټولو افغانانو مسؤلیت دی چې هېواد د کورنیو جګړو څخه وژغوري.

امریکا کې میشت افغان مبصرینو په قطر کې د طالبانو سیاسي مشرانو سره د ویډیو کنفرانس له لارې د افغانستان د سولې د اړوند خبرې وکړې.

هاشم وحدتیار چې د دې غونډې نوښت یې کړی وو، ازادي رادیو ته د دې خبرو په هکله داسې وویل:"دا د ټولو افغانانو مسؤلیت دی چې هېواد د کورنیو جګړو څخه وژغوري او تلپاتې سولې لپاره کار وکړي. موږ هم دلته په امریکا کې میشت مبصرینو وغوښتل چي د طالبانو سیاسي مشرانو ته د افغانستان انځور د نړیوال لینز څخه وروښایو او په افغانستان کې د تلپاتې سولې لپاره د دوی مسولیتونه روښانه کړو."‎

وحدتیار زیاته کړه چې د طالبانو له سیاسي مشرانو يې وغوښتل چې اوربند وکړي:"موږ دا وړاندیز هم وکړ چې که طالبان په ټول هېواد کې اوربند نه کوي، حد اقل په ښارونو کې او چیرته چې د خلکو ګڼه ګوڼه وي، هلته دې اوربند وشي تر څو د ملکي تلفاتو مخنیوی وشي.موږ د طالبانو سیاسې مشرتابه باندې غږ وکړ چې په جدیت سره غواړي چې افغانستان کې د تلپاتې سولې لپاره کار وشي، دا فرصت به تل نه وي او راتلونکې کې به دومره آسانه هم نه وي. طالبان دې له دې فرصت څخه ګټه پورته او سوله شونې کړي."

په دې ناسته کې افغان مبصرینو هر یو هاشم وحدتیار، ډاکټر روښان نورزی، ډاکټر ادریس رحماني او حسین مهرمي هېواد کې د تلپاتې سولې لپاره ویناوې او څرګندونې وکړې.

په دې غونډه کې، د طالبانو سیاسي مشرانو ځینو پوښتونو ځوابونه وویل او د دوی په اصطلاح د اشغال ختم، اسلامي نظام حاکمول، بین الافغاني خبرې او تلپاتې سولې اړوند خبرې وکړې.

د طالبانو سیاسي مشرانو دا راز مجالس او له بھرمېشتو افغان مبصرینو سرہ د افغانستان اړوند او تلپاتې سولې اړوند بحثونه ګټور وبلل.

د ورځې تازه خبرونه دلته ولولئ

پر غزې د اسراییلو سخت بریدونه؛ د عربانو او یهودانو ترمنځ ناکرارۍ زیاتې شوي

ارشیف

اسراییل نن پر غزې وروسته تر دې بریدونه سخت کړل چې په لویدیځه غاړه او له لبنان سره پر پوله شخړې رامنځته شوې. همدا راز د عربانو او یهودانو ترمنځ په کوردننه ناکرارۍ زیاتې شوي.

اسراییلي الوتکو پر غزې بیا بمبارۍ ورکړې او حماس وسله والو په ځواب کې د اسراییل په لور توغندي وویشتل.

فلسطیني روغتیاپالان وایي چې په یوه هوایي برید کې د غزې په شمال کې لږ تر لږه څلور تنه وژل شوي دي او د اسراییل په دوو جنوبي ښارونو کې د توغندیو د راتګ په خاطر د خطر د زنګونو غږونه اوچت شوې دي.

فلسطینیان وایي چې په لویدیځه غاړه کې له اسراییلي امنیتي ځواکونو سره د مظاهره چیانو د اخ و ډب پرمهال یولس تنه وژل شوې دي. د فلسطینیانو د روغتیا وزارت په وینا د دې اخ و ډب پرمهال پنځوس تنه نور پر مرمیو او ربړي مرمیو ټپیان شوې دي.

د فلسطنیانو د روغتیایي چارواکو په وینا په غزه کې له دوشنبې راپه دې خوا لږ تر لږه یوسل او دوه دیرش تنه د ښځو او ماشومانو په ګډون وژل شوې دي.

د اسراییل لور ته د اتو تنو د وژل کیدو خبر ورکړل شوی دی.

د بیان ازادي د خونديتوب په پار انلاین غونډه وشوه

ارشیف

تر پنځوسو د ډېرو هېوادونو او لویو ټکنالوژي کمپینو استازیو نن په انلاین غونډه کې پر دې خبرې وکړې چې څرنګه په انټرنټ کې ممکنه ده چې د بیان ازادي خوندي شي او د افراطيانو د تبلیغاتو مخه ونیول شي.

دا غونډه د هغو نړیوالو هڅو برخه ده چې د فرانسې ولسمشر امانویل مکرون او د نیوزیلنډ صدراعظمې جاسیندا اردیرن د دوی پر هېوادونو له خونړیو بریدونو وروسته چې پر ټولنیزو رسنیو خپرې شوې، پیل کړې.

په نیوزیلنډ کې دوه کاله مخکې یو سپین پوستي توکمپالي یو پنځوس مسلمانان په جوماتونو کې ووژل او دا برید یې د فیسبوک له لارې په ژوندۍ بڼه خپور کړ.

په فرانسه کې بیا یو استاد سامویل پاتي په اکتوبر کې یوه مسلمان افراطي وروسته تر دې وواژه چې دې ښوونکي د زده کړې پرمهال د اسلام د پیغمر تصویر ښکاره کړی و او دا بهیر ان لاین خپور شوی و، د دې ښوونکي قاتل بیا وروسته په انټرنټ کې پر خپل برید ویاړ وکړ.

د نننۍ غونډې په پیل کې د فرانسې ولسمشر امانویل ماکرون وویل چې پر ښوونکي سامویل پاتې به دا برید کله هم هیر نه شي.

ښاغلي ماکرون زیاته کړه چې ترهګر له انټرنټه د خپلې پروپاګندې لپاره استفاده کوي چې ډیموکراتیک ځواکونه او د بیان د ازادیو مدافعان باید دې ستونزې ته سمه حل لاره پیدا کړي.

د چین فضایي بیړۍ د مریخ پر غولي  خپل روبات ښکته کړ

Mars Missions

د چین فضایي بیړۍ نن په بریالیتوب د مریخ پر غولي خپل روبات ښکته کړ. دا د چین او د دغه هیواد د فضایي پروګرام لپاره یوه تاریخي لاسته راوړنه ده.

د چین 'سي.سي.ټي.وي' دولتي ټلوېزیون د مریخ پر غولي د دې روبات د کښیناستو راپور ورکړ.

د دغهّ هېواد د رسمي اژانس سینهوا په وینا، د ( تیان وین-یو) په نوم فضایي بیړۍ مریخ ته ورسېده او دا لومړی ځل دی چې د چین یو روبات پر دې سیارې کښیني.

د ژورونګ په نوم روبات چې شپږ پښې لري، نژدې درې میاشتې به په مریخ کې تیرې کړي او له هغه ځایه به د کاڼو سیمپلونه د څیړنې لپاره مځکې ته راوړي.

روغتیا وزارت: تېر شپه او ورځ کې کرونا ۶ تنه مړه کړي او ۷۰ پرې اخته دي

ارشیف، کابل کې د افغان-جاپان روغتون چېرته چې پر کرونا د اخته ناروغانو درملنه کیږي.

د اختر په لومړۍ او دویمه ورځ د خلکو له راټولېدو سره-سره افغانستان کې د کرونا مثبتې پېښې نسبتًا کمې ثبت شوي.

د عامې روغتیا وزارت مرستیال ویاند میرویس عليزي پرون جمعه ازادي راډیو ته د تېرو ۲۴ ساعتونو د کرونا ارقام داسې په ګوته کړل: "تېرو ۲۴ ساعتونو کې د هېواد په دولتي او خصوصي روغتونونو کې د ۵۶۶ مشکوکو کسانو ټېسټ شوي چې له دې شمېر ۷۰ تنه مثبت دي. په دې سره په کرونا ناروغۍ د اخته کسانو شمېر ۶۳۴۱۹ تنو ته ورسېد. دې موده کې ۱۵ تنه روغ شوي او ۶ تنو ژوند له لاسه ورکړی."

عامې روغتیا وزارت د اختر په لومړۍ ورځ د کرونا مثبتې پیښې ۲۶۱ اعلان کړې وې.

له دې وړاندې چارواکو په وار- وار ویلي، د کرونا غیر رسمي شمېرې زیاتې دي، ځکه په خبره یې ډېر کسان په اسانه د معایناتو لپاره روغتونونو ته نه ځي.

د غور امنیتي او دفاعي چارواکو ته د کورنیو چارو وزارت جدي سپارښتنې

ارشیف، د غور مرکز فیروزکوه

د کورنیو چارو سرپرست وزیر د غور امنیتي او دفاعي چارواکو ته د دولت د وسله والو مخالفانو د تهاجمي تحرکاتو د جدي ځواب سپارښتنه وکړه.

حیات الله حیات چې تردې مخکې په هرات کې و، په غور کې د امنیتي وضعیت د ارزونې پرمهال دا سپارښتنه کړې ده.

غور چې له نارامو ولایتونو هلمند او فراه سره ګډه پوله لري، وروستیو څو اونیو کې د ناامنیو د څو پیښو شاهد و.

په یوه تازه پېښه کې د فیروز کوه دننه یوه نفوذي کس په یوه پوسته کې څلور پولیس ووژل او په تېښته بریالی شو.

یو شمېر جرمني دیپلوماتانو له چارواکو د ځینو افغانانو لاسنیوی غوښتی

ارشیف، بغلان کې یو شمېر جرمني سرتیري

د جرمني یو شمېر دیپلوماتانو، پوځي افسرانو او پوهانو له خپلو چارواکو د هغو افغانانو لاسنیوی غوښتی چې جرمنیانو سره یې افغانستان کې کار کړی دی.

په یوه لیک کې چې یوه کاپي یې 'ډي.پي.اې' اژانس ته رسیدلې راغلي، طالبانو ښکاره خبرداری ورکړی چې افغانستان کې به د لویدیځوالو د همکارانو پر وړاندې اقدام کوي.

د لیک په دوام کې راغلي، باید ژر تر ژره هغه افغانان جرمني ته انتقال شي چې تېرو دوو لسیزو کې یې له جرمني ځواکونو سره کار کړی دی.

وړاندې راغلي، که داسې اقدام نه کېږي، په دې معنا ده چې جرمني خپل پخواني همکاران له کومې دفاعي وسیلې پرته یوازې پریږدي.

تراوسه د جرمني چارواکو په دې اړه څه نه دي ویلي، خو له دې وړاندې ځینې هغه افغانان جرمني ته غوښتل شوي چې د دغه هېواد له پوځیانو سره یې کار کړی دی.

تاجزاده، د ایران ولسمشریزو ټاکنو کاندیداتورۍ ته نوم­لیکنه وکړه

په ایران کې د اصلاحپالو یوه وتلی شخصيت او سوداګر سید مصطفی تاجزاده

په ایران کې د اصلاحپالو یوه وتلي شخصيت او سوداګر سید مصطفی تاجزاده، د دغه هېواد د ولسمشرۍ ټاکنو د کاندیداتورۍ لپاره نوم­لیکنه وکړه.

تاجزاده چې ۶۴ کلن دی، د ایران په کورنیو چارو وزارت کې د خپل نوم تر ثبتولو وروسته وویل، د بریا په صورت کې به په نظام کې اساسي بدلونونه راولي: "زه د امریکا او روسیې پر خلاف د ګرانبیه بهرني سیاست مخالف یم. موږ به د خبرو اترو او روغې جوړې لوری خوشې نه کړو، حتی که مقابل لوری له موږ سره جګړه هم غواړي."

سید مصطفي تاجزاده د ایران د پخواني ولسمشر محمد خاتمي په اداره کې د کورنیو چارو وزارت مرستیال په توګه دنده ترسره کړې ده.

په پام کې ده په ایران کې د ولسمشرۍ دیارلسم انتخابات د روان میلادي کال د جون میاشتې پر ۱۸مه وشي.

اسراییل پر غزې خپلې حملې لا پسې شدیدې کړي

اسراییلي ځواک

د اسراییل هوايي ځواک پرون جمعه پر غزه خپلې حملې لا پسې شدیدې کړي.

راپورونه وايي، په دغو حملو کې چې په پرله پسې ډول یې ۴۰ دقیقې دوام وکړ، ۱۳ کسان وژل شوي دي.

په غزه کې روغتیايي چارواکي وايي، په وژل شویو کې یوه مور او د هغې درې ماشومان هم شامل دي.

بل خوا اسراییل وايي، د درنو حملو هدف، د هغې سمڅې له منځه وړل وو چې د حماس ډلې افراطي وسله والو د تګ راتګ لپاره ترې استفاده کوله او راکټونه یې لېږدول.

د حماس ډلې له خوا هم د اسرائیل پر جنوب راکټي حملې روانې وې.

د فلسطین روغتیايي چارواکي وايي، له دوشنبې راهیسې د اسرائیل په حملو کې ۱۲۲ کسان وژل شوي او تر ۹۰۰ زیات نور ټپیان دي.

په پنجشېر کې ۲ تنه د چرسو د قاچاقو پر مهال ونيول شول

آرشیف، د نشه يي توکو قاچاق کوونکي

په پنجشېر ولایت کې دوه تنه د چرسو د قاچاقو پر مهال ونيول شول.

له نشه يي موادو سره د مبارزې معينيت د رسنيو دفتر ازادي راډيو ته وويل،۲۰ کيلو ګرامه چرس چې د ګازو په يوه ډبه کې پټ ايښودل شوي او په پام کې وه چې د يوه سراچه موټر په وسيله له پنجشېر ولایت څخه کابل ته قاچاق کړل شي، د دالاسنګ په سيمه کې د موټرو د تلاشۍ پر مهال ونيول شول.

تورن کسان له نشه يي موادو سره د مبارزې عدلي او قضايي مرکز ته معرفي شوي دي.

د نشه يي توکو ۴۱ قاچاقچیان په بند محکوم شول

آرشیف، په بغلان ولایت کې په نشه يي توکو یو قاچاق کوونکی نیول شوی. عکس تزئیني بڼه لري

د محکمو له خوا تر څلوېښتو ډېر قاچاق کوونکي په بند باندې محکوم شول.

له نشه يي موادو سره د مبارزې عدلي او قضايي مرکز ابتدائیه او استيناف محکمو د خپلو علني غونډو په نتيجه کې د نشه يي موادو ۴۱ قاچاق کوونکي چې د قاچاقو ۴۰ قضيې يې درلودې او د امنيتې ادارو له خوا نيول شوي وو، له دوو څخه نيولی بیا تر اتلس کاله پورې په بند باندې محکوم کړل.

له نشه يي موادو سره د مبارزې مرکز وياند خالد موحد ازادي راډيو ته وويل، له دې محکوم شویو خلکو سره ۶۷ کيلو ګرامه هيرويين، ۴۲ کیلوګرامه مورفين، ۱۴۱ کیلوګرامه تارياک، نژدې شل کيلوګرامه ښیښه، ۱۹۶ کيلوګرامه چرس او اته سوه کيلوګرامه بنګ نيول شوي وو.

امریکا د فلسطینیانو او اسرائیل ترمنځ د کړکېچ د بندېدو غوښتنه وکړه 

د امریکا د متحدو ایالاتونو د بهرنیو چارو وزیر انتوني بلېنکن

د امریکا د متحدو ایالاتونو د بهرنیو چارو وزیر، د فلسطینیانو او اسرائیل ترمنځ د روان کړکېچ د بندېدو غوښتنه وکړه.

د اسراییل پوځ نن سهار بیا د حماس ډلې د بریدونو په ځواب کې پر غزې تړانګې د توپونو ډزې او هوايي بریدونه کړي دي.

د حماس ډلې تر ولکې لاندې روغتیايي چارواکي وايي، د وروستیو څلورو ورځو په تاوتریخوالي کې د ښځو او ماشومانو په ګډون لږ تر لږه ۱۱۹ فلسطینیان وژل شوي دي.

اسرائیلي چارواکو د راکټي حملو له کبله د یوه سرتېري او دوو ماشومانو په ګډون د ۸ کسانو د وژل کېدو راپور ورکړی دی.

د امریکا د بهرنیو چارو وزیر، انتوني بلېنکن په واشنګټن کې د خبرو پر مهال وویل: "​موږ د اسرائیل پر سړکونو تاوتریخوالي ته سخت اندېښمن یو. په داسې حال کې چې مسلمانان اختر لمانځي او یهودان د شاووعوت د لمانځلو لپاره چمتو کېږي، اسرائیلیان او فلسطینیان د دې مستحق دي چې له وېرې او تاوتریخوالي پرته دغو مراسمو کې ګډون وکړي."

د ملګرو ملتونو امنیت شورا هم د فلسطین او اسرییل پر وروستیو کړکېچونو د بحث لپاره راروانه یکشنبه یوه غونډه پلان کړې ده. بلخوا د نړیوالې جزايي محکمې مخکښې څارنوالې فاټو بېنسودا ویلي، دغه محکمه ښايي د ناامنیو په تازه پېښو کې د دخیلو کسانو په وړاندې اقدام وکړي.

جاپان کې نافذ شوی بېړنی حالت وغځول شو

ارشیف، جاپان کې پولیس

په جاپان کې د کرونا ویروس د خپرېدو له اندېښنو سره جوخت نافذ شوی بېړنی حالت وغځول شو.

دا په داسې حال کې ده چې په توکیو کې د المپیک پلان شوېو مسابقو ته یوازې ۱۰ اوونۍ پاتې دي.

په جاپان کې درېیو ګڼ مېشتو ساحو چې د کرونا ویروس تازه پېښې په کې په چټکۍ په زیاتېدو دي، د توکیو او پنځو نورو ایالاتونو لار خپله کړه چې له وړاندې د دې میاشتې تر پایه په کې د محدودیتونو غځولو پرېکړه شوې وه.

د جاپان صدراعظم یوشی­هیده سوګا نن دا خبره داسې وخت وکړه چې جاپان د المپیک مسابقو په درشل کې د کرونا ویروس د خپرېدو د سوکه کولو لپاره مبارزه کوي چې دې کار د جاپان روغتیايي سیسټم له فشار سره مخامخ کړی دی.

د افغانستان د ټکواندو درې لوبغاړي اردن ته لاړل

اردن

د افغانستان د ټکواندو درې لوبغاړي په اسیايي لوبو کې د ګډون او د توکیو په سږنیو مسابقو کې د ونډې ترلاسه کولو لپاره اردن ته روان شول.

دغه دوې ورځنۍ مسابقې د مې میاشتې پر ۲۱مه پیلېږي چې د لومړي او دوهم مقام ګټونکي به د توکیو د المپیک مسابقو ته لار پیدا کړي.

د افغانستان د المپیک ملي کمېټې د خپرونو مشر عارف پیمان، د ورزشکارانو د ننني سفر په اړه ازادي راډیو ته وویل: "د افغانستان د ټکواندو ټیم په ترکیب کې دوه هلکان او یوه نجلۍ شامله ده. د ونډې ترلاسه کولو د مسابقو بله کاندیده نجلۍ، سومیه غلامي، د کرونا د مثبت ټیسټ له کبله د دغې ډلې له ترکیب څخه پاتې شوه."

د جاپان په پلازمېنه توکیو کې د المپیک مسابقو لپاره د ورزشکارانو د ګډون د چمتووالي هڅې په داسې حال کې روانې دي چې په دغه هېواد کې د کرونا وایروس د بلې څپې په اړه اندېښنې ولاړې شوې دي.

د رویټرز اژانس په حواله، په دې اړه د اندېښنو له کبله ۳۵۰ زره لاسلیکوونکو د المپیک مسابقو له تنظیموونکو غوښتنه کړې، چې دغه سیالۍ دې لغوه شي.

په پام کې وه، په توکیو کې دغه مسابقې تېر میلادي کال وشي، خو د کرونا وایروس له کبله وځنډول شوې.

د اوربند دوهمه ورځ؛ کابل کې بمي چاودنې ۱۲ تنه ووژل

د شکردرې نننۍ پېښه

په افغانستان کې د درې ورځني اوربند په دویمه ورځ نن لږ تر لږه ۱۲ کسان په کابل کې د بمي چاودنې له کبله ووژل شول.

د کابل امنیه قومانداني وايي، په دې چاودنه کې چې د شکردرې ولسوالۍ په یوه جومات کې د جمعې د لمانځه پر مهال وشوه، د جومات ملا امام مفتي نعمان هم وژل شوی دی.

بل خوا د کورنیو چارو وزارت وايي، په چاودنه کې شااو خوا ۲۰ کسان ټپیان شوي دي.

د دغه وزارت مرستیال ویاند، حامد روشن رسنیو ته، د پېښې په اړه څېړنې پیل شوې دي: "زموږ لومړنۍ څېړنې ښيي چې دغه چاودنه په جومات کې دننه د ځای پر ځای شویو موادو له کبله شوې ده. زموږ څېړنې لا هم روانې دي."

د وسله والو طالبانو یوه ویاند ذبیح الله مجاهد په یوه اعلامیه کې دغه چاودنه غندلې ده.

له اوربند سره- سره د اختر په اوله ورځ په کندهار، کندز او غزني کې د ماینونو د چاودنو له کبله لږ تر لږه د ۱۱ ملکیانو د وژل کېدو راپورونه ورکړل شول.

دفاع وزارت: د کندهار هوايي ډګر د پوځي اډې مسوولیت اردو ته سپارل شوی

د کندهار هوايي ډګر

د افغانستان دفاع وزارت وايي، تر دې وروسته به افغان ځواکونه د کندهار هوايي ډګر، له پوځي اډې د ټرورېزم پر وړاندې د مبارزې لپاره کار اخلي.

د دغه وزارت مرستیال ویاند فواد امان نن جمعه ازادي راډیو ته وویل: امریکايي ځواکونو د کندهار هوايي ډګر د پوځي اډې مسوولیت ملي اردو ته سپارلی: "تر دې وروسته به د افغانستان دفاع وزارت له دې پوځي اډې د ټرورېزم پر وړاندې د مبارزې لپاره کار اخلي. افغان لوري ته د امریکايي ځواکونو له خوا د پوځي اډو او کمپونو د سپارلو لړۍ په بریا سره روانه ده."

بل خوا امریکايي چارواکو هم ویلي، امریکايي ځواکونو د کندهار هوايي اډې بشپړ مسوولیت افغان لوري ته سپارلی دی.

د امریکا سټارس اینډ سټرایپس ورځپاڼې راپور ورکړی چې د نړیوال ائتلاف پوځیان به د امنیتي اندېښنو د ارزونې لپاره یوه یا دوې ورځې لا هم د کندهار هوايي ډګر په پوځي اډه کې پاتې وي.

که څه هم د دې اډې مسولیت رسما افغان چارواکو ته سپارل شوی خو تر اوسه دا څرګنده نه ده چې کله به ترې د ټولو بهرنیو ځواکونو وتل بشپړ شي.

له افغانستانه د امریکايي ځواکونو وتل د مې میاشتې پر لومړۍ نېټه پیل شوي او د سېپټمبر تر یوولسمې نېټې دوام کوي.

نور راوښيه

XS
SM
MD
LG